「海係好恐怖的，尤其是夜晚。個海同個天一樣咁黑，你好似去咗另一個世界。」
「你有冇見過十幾層樓高的浪？我就見過，好似成道牆咁擺在你臉前。你話驚唔驚？」
「個海好惡㗎，唔係人咁品。你有冇聽過投奔怒海？話你知，傻佬先至會投奔怒海。」
「咩叫絕望呢？絕望就係，成個海都係水，但你一啖都唔飲得。」
爺爺年輕的時候當過好幾年海員，即是所謂的「行船」。這使他對大海充滿了敬畏，甚至在我很小的時候，便開始跟我灌輸大海有多可怕，嚇得我最後連水也學不會游。他又說我命格五行忌水，所以註定了我不會太聰明，因為「智者樂水，仁者樂山。」
「但做仁者呢，响呢個弱肉強食的社會，通常都冇乜好下場。」
曾經有一段時間，我覺得爺爺那些對於大海的見解，不過是「吹吹水」。直至到長大後，我才理解到其實每一句話背後都充滿了哲理，只是當時我太年輕無法參透。
很記得我在大學畢業後，便順利地找到了一份自以為理想的工作。可是返了一年以後，才發覺現實與想像之間原來充滿了各種落差。那一年不單只事事碰壁，讓我質疑自己的能力，甚至開始懷疑人生。幸好當時爺爺開導了我，往後的路我才不至於愈走愈迷茫。我很記得他曾經這樣鼓勵我：
「你就好似係一艘船的船長，但一直以來，你都只係沿住海岸線來航行。而家終於有機會可以將架船駕出大海，東南西北去邊都得。不過，個海太大，所以你一時之間，唔知道應該駕去邊個方向，所以會感到迷茫係好正常的⋯⋯而其實邊個方向都冇問題，因為只要你堅持一直駕落去，最後一定都可以駕到大海的另一面。到時候，有機會望返轉頭，你就會知，之前經歷過的風浪，原來都冇乜大不了啫。」
然後我問：「咁如果我去到中途，堅持唔到呢？」
「堅持唔到，咪搵個島仔泊埋去休息下囉！可能到時你又會發現，呢個島先至係你最想去嘅目的地。」
「茫茫大海，邊有咁多島呀？話搵就搵到咩？」
「傻仔，唔駛搵㗎。到時你自自然就會遇到㗎喇。」
「但係⋯⋯如果真係冇遇到呢？」
「唏，你有冇睇過有本小說叫《老人與海》呀？本書講有個老漁夫，出海差不多三個月連一條魚都釣唔到，但最後都俾佢他遇到一條大魚，佢同條魚搏鬥咗足足兩日兩夜先捉到佢。」
「但當佢將條魚綁在船邊，起程返屋企嘅時候，條大魚就俾沿途啲鯊魚係咁食。最後隻船返到碼頭，就只剩返副魚骨，同埋一個疲累的老人。」
「咁又點？佢真係有同條魚搏鬥過，出盡哂力。唔通呢啲經歷係假嘅？」
Storyteller：方恨小
Illustration：沈君怡
Bookmark 
